قصيدة للشاعر محسن الدخيلي

البصرة زعلانة
البصرة زعلانه يَعَبد الله عليك
أو حَلِّفتْني اتريد أوديلك تمر ما بيه نُوَه
تخاف حكهه أعله النُوَه ايخضر غريب
تخاف حكهه أعله النُوهَ ايخضر ذليل
أو تدري إنته أفضالة الفقره النوه
الكَاع حصتها النوه…..
الكَاع والفقره يَعَبد الله سوَهْ
إشلون ترضه اتبات وي جتال أبوك أو من هواه تاخذ هوه
الغربة تكتل ونته بس ريحة عدل وبلايه صوت
الغربة هيكل عظمي موت إبلايه موت
إتهون من تفرش إديك أويه الدعاء…إتهون بس اشلون بالماعنده ادين
إتهون من تلكه دمعتك بالسماء إتهون بس اشلون بالماعنده عين الغربة كاس…..
إلباع روحه ايعيش وي روحه غريب إبلايه ناس
إلباع جنسيته أو هويته أو باع ساسه ايعيش عمره ابلايه ساس
الباع مسقط راسه يبقى ابلايه راس.. ابلايه ديره…. ابلايه دار
الديره والبستان وانه أوكبر أبوك… إنحارب الهل يوم والديره عُمارْ
إشماخذك ونته ابن أبوك…… الوحشة تكتل ونته لا ديره ولا بستان أبوك
أو دمعة أمك صارت أعله الكاع دمعتها مزار…. الغربة تكتل
إي يعبد الله تره الغربة حصار.. العازه كلفه
أوكلفه من تخله تره جفوف الشريف…. إيه ياوسفه يعبد الله صرت عبد الرصيف
أوجانت أمك إنته تذكر من تجوع يصير….مدري شلون جف أمك رغيف
الغيره جام..لا يعبد الله حرام اتبوك جف أمك حرام
إشلون ترضه اتعيش وي جتال أبوك أو تَمِّنْ أوكلبك ينام
أوتدري إنته الكاع بالممشه تره اتبوس الجدام
أوبوسة أجدامك تراهي الكاع غير أهلك حرام
أوشارة اليحلف تره إبكاع الربه شارة إمام
البصرة زعلانه يعبد الله عليك مارضت حتى أوديلك سلام
__________________