قصيدة للشاعر الشطري كرار العبودي

أنا وجاري
كال جايبلك بطل ضايع علينه
كتله وينه؟
كال هذا الشايل السيف بيمينه
كتله مو عباس والله
كال لا مطفيه عينه!
كتله اذا طبيتو لينه...
يعني من جف الوطن سقطت مدينه
وانت مو همك دمعنه
وهذا منديلك جفن موعود بينه
ردّه مو نضحك بعدنه وما بجينه
وما سكت..ضل يحجي عن كل اليجينه
ومن شفت لون البرد راواني جمره
ومن جبت طاري الكصب سمّعني طينه
وجان جو العيشه يحرك
كام علّكلي المراوح
ما رضيت يشيل جفّه
كتله شنقت روس اخوتي..
لكن اتحداك تشنقني المهفّه
وعدنه ناس اتعودت وكت السكون اتصير شفّه
وعدنه كل طبّة رتل سموهه زفه
واحنه قائدنه مثلكم
طيب وراضي بنصيبه!!!
وشنهو عيبه؟
بس يشم ريحة نفط ينفتح جيبه!
والمصيبه...
جفنه يرسم طفل صايم..
وبالأذان اتعنّه جفكم
كتب كلمة(قاذفه) وفجّر حليبه!
وعدنه أم اتفوح طيبه
وعاشت اجيال بحضنهه
وجانت اتمد جفهه للناس الغريبه
وهسه ماتت جوع ما طلعت وحسّت بالنهيبه
لأن شيلة راسهه اخترقتهه شيبه
وهاي آيه
ولذلك بعد ما أحتاج رايه
آنه اسقط الكون بس ارفع عبايه
وانت ضدي امن البدايه
وياهو اليبدل نهاره بليل ويصدك الروايه؟
انت لو خطّار مرّه اتمر علينه...
اتطفّر اورود المدينه
وتنذبح لجلك بنايه
وماكو جار ايريد جاره..
آنه اسمك من اذكره امن الوطن تشرد عماره
وهيّه شاره
القصف كبّة امام..ايصلّي ببيوت الدعاره
وبعد ما أحجي الحقيقه
حتّى اكلّك عدنه عزرائيل ما طوّل دقيقه
وآنه مو طبعي طبعكم
واعتذر عن السوالف
آنه آسف
لأن كسرو ظهر جاري
وما صرتله احزام ناسف