الغربــــــــــــــــــــــــــــــــــــــه

رحمن الغر يب

حينما أراد الشاعر الحبيب رحمن الجبوري ترك العراق
والسفر خارج حدود الحب والدمع
كانت حروفي
......................
هايرحمن الجبوري

لا ......
اعتذر غلطان بسمك
ها(يرحمن الغريب)

الدنيه ليل
وفاتحه بصف فاتحه بصف فاتحه بصف
خلنه نفرح بلكت الچادر التاسع بيه عرس...........

ظلمه مهجوره المحطه وما أشوفك ونته يمي
شلون من تروح أظنك تاخذ وياك الشمس...........

لاتگلي
...........بلايه ماتعبر حدود أنته غريب
انته عالفقره تشگ زيج الدموع
وتحبل عيونك نثايه
...........وفو گ وجناتك تجيب

وأنته من تسمع شطر بيه صوره حلوه
تصير شمعه
تصير دمعه بلايه عين
.دموع من مطلعهه حد الخاتمه...........

شلون بالغربه الشعر شيسوي بيك؟؟؟؟
وانته شاعر...........

يعني إذا ماتكتب اتطر باب گلبك
والشعر يزعل عليك
وتو گف بعينك جروحك

والمصيبه شلون من تكتب قصيده
وحلوه تطلع چنهه بنتك وماردتهه تظل غريبه
وشگگتهه
وأنته كاتبهه أعله روحك
.لازم تشگ حته روحك...........


شلون والودام غريبه
وصفنة عيونك غريبه
وأنته ماشي بلامتاع
أنته ماتدري متاع الغربه لازم
عين وكحه
وگلب قاسي
وحيل ذيب

............وأنته تبچي عله العصافيرالتدگ شباچ بيتك
شلون لو چفك يدگ باب الحدود
وترس أذنك
تسمع أمك تمسح الصوره القديمه بچف شفايفهه وتصيح
أهنااااااااا( يرحمن الغريب
............

وتمشي
بس تمشي أعله جرحك شايل الدنيه اعله راسك
شايل هموم العراق
....الموت
......والدم
.........والصليب
وتحني راسك
وتسمع الوادم تسولف
وواحد أياشر عليك
.مدنگ الأخ يستحي مبين غريب......................

وكلشي بالغربه حجر
.حته الدمع ينزل عله خدودك حجر

وماظل طعم حته الدموع تغيرت
بالغربه واهسهه انكسر
الليل رد باب الشمس وأنكسر شباچ الصبح...........

والشارع يطفي الضوه
ويشتعل فانوس الجرح...........

وتفوت بالشارع غريب الدنيه والبيبان تتلفت عليك

وماكو باب يرد وحشتك
ولاكو باب اليحمل النار البديك

وبابك الخليته خايف
هسه هم خايف عليك
وشلع روحه
متاني ترجع دگتك

شگد وفي بابك (يرحمن الجبوري
شلع روحه وگاعد أعله الباب ينطر جيتك
شلع روحه وگاعد أعله الباب ينطر جيتك


ميثاق الهلالي