قصيدة للشاعر المبدع اين مايبحر فهو علاء الياسين

البستان يبجي000الغصن واحد والعصافير الف

انته يل جفك اجه ايصلح عمرنه
شرد اكلك وانته بيك النار
واطفي بجمرنه
انته يمك خوفنه اتسويه امان
وحته جرح البينه هسه
اتشوفه عينك
جنه طايب من زمان
انته يل بس انته واتعب.....
حرف الاول بسمك ايعادل جمل
وانته ذاك الماينصفك
يكفر بخير العمل
كمنه نقره اسمك يكولون الحمد
كمنه نزرع بالحدايق وجهك
ايخضر ورد
كمنه بس من كمنه اصلا
ماكو ثوره
بحظن جفين الثلج ضمينه جمره
انته.........واحنه
انته باقي واحنه ضعنه
احنه ضعنه مافهمناك شتريد
وانته باقي
جي لان فاهم وضعنه
وجي سمعناك اشصحت بس ماسمعنه
وجي صحتنه ومارجعنه
وجي رسمتنه حمامه
واحنه بدلناهه طعنه
وجي شفتنه
انكول عل البستان هيمه
اتيقنت خسرانه معركة الضماير
حضرت لنار خيمه
وانته بس الضام بعيونك امل
لصحره غيمه
صرحت وهنانه موقف
البل العلن يسحكله ورده
بكلبه معركه الحقد كلش قديمه
وعدنه غيمه اطباعه اطباع البشر
اتعوف حلك الصحره يابس
تمطر بحضن النهر
من العطش تيهنه كلشي
كمنه نرسم غيمه وانتاني المطر
كمنه نرسم جفن نايم واحنه ذابحنه السهر
انته .........واحنه
انته عايش واحنه متنه
انته عايش علمتنه الموت
للحريه باب
واحنه متنه
جي نسينه شعلمتنه
وجي نسينه الصوت اذا مو النه اصلا
مانسمعه
وجي لان صدكنه واحد
جاب عمر ايسب ضلام الليل مايشعله شمعه
وجي لان صدكنه خدعه
صار عدنه السيف قانون الحياة
الورده بدعه
مو جديده
علمتنه افكارهم حاله جديد
انجذب القرأن وانصدك الجريده
انته واحنه
انته جاي واحنه رحنه
انته جاي وتندل ادروب الضماير
واحنه بول خطوه طحنه
سكتتنه وفهمت هوسه حجينه
جف طفل عطشان مايروي المدينه
ماريد كل جديد وعقله اقدم من بجينه
وماريدا كلمن ايذكرنه بينه
واحنه اصلا مانسينه
وكون اريدا واحد ايطفي لهيبي
وكون ياخذ فرصه حلوه
ويرسم بكد الوطن كلمة حبيبي
كون بس الكون راحت واحنه نبجي
كون مانرضه الفرح يشرب جكاره
وكون بسم الوطن ماتصعد تجاره
كون بس الكون راحت
احنه صفكنه القزم سب المناره