قصيدة للشاعر الشطري لؤي العبودي أحد القمم المرتقبة في الشطرة

أمنيات شاعر

ليلي من إيفكلي بابه ... الكه مزدحمه اعله بابه
امنيات أشكَد فريده
مولأن شاعر أريده .... كل عراقي إيكون شاعر
هذا حتى انته التريده
حتى جارك من تزعله ... مو بوجهك بندقيه
حتى يرفع قلم بيده
و حتى طول العمر يبقى ... إيخاف يرمي بيوت غيره
وتنرمي بيوت القصيده
والرصيف اعله الجرايد ... يتسع ارفض قياسه
وتكَرب أحزان البعيده
حتى لونام الفقير ... اعله الرصيف إيكفي جسمه
حدره من يفرش جريده
وكل زعيم إيطيعه ارفض .... شعبه اذا لمن يطيعه
يعتبر شعبه عبيده
وكون مني الراد اتبعه ... إيفيدني إيفكر ابيش
مو يفكر بيش أفيده
وكون ماحل دم أخوتي ... حتى ماحل دمي بيدي
وهاي موفرضاَ أكيده ؟؟
مره واحد راد دمي .... تبرعت من جان كَلبي
أبيض و. مابي مكيده
وبعد جم يوم اختلفنه ... ومانزف دمه ابطعنتي
نزف دمي من وريده
وكون يمي اليجري دمعه ..... ماانشف ابجفي دمعه
لازم ابجف اليريده
لأن جفي هواي ملت ... و كَامت أمن اتهل دمعهه
جفونهه تلزمه وتعيده
وصار عباس المدامع ... عدهه والعين الحسين
وملزمه بهاي العقيده
وعدهه هاي الدنيه حومه ... وترفض العباس بيهه
ينزل ويترك عضيده
وكل زمن كون النشيدي ...نغمه وحده وما أخفي
الكل وجه نغمه جديده
كون طبع البلبل آخذ ... إيكَابل أغراب أو حمامه
فقط بس نغمه بنشيده
وكون اليعرف الثوره ... مو فقط دم وبنادق
لأن ثواراته عديده
اعله درب الجوع كل أم .... زرعت البسطيه عبوه
تعتبر ثوره مجيده
ولأن تدري الجوع مشرك ... اتشهدت كَدام سيفه
وجانت الفكره سديده
الهه جذبت نضر سيفه ... وبقت البسطيه ملجىء
لليحس روحه وحيده
ويعتبر ثوره مجيده
الشايب الجف إيده مادكَ .... غير بيبان المساطر
لأن بس هيه رصيده
وبسباق الزمن عافه ... السنين أبعمره تاكل
والكرك ياكل أبإيده
وكون الهلال اليجينه .... يحذر ومو بغته جيته
ولليتيم الهم يزيده
حتى فوكَ الكَاع نرسم ... كلشي موجود بسمانه
بلكي عن حزنه نحيده
حته ما يرفع اعيونه ... للسمه وهلال يلكَه
ويبدي يذكر كَبل عيده
مراجيح هدوم حلوه ... ملونه ومو سوده جانت
شكثر ذاكرته عنيده
والأشد من يبدي يذكر ... بالمراجيح اليهزه
ويكَعد ويتأمل إيده
الهذا يرفض يجي بغته .... لأن كَبل المطر جاره
الغيم حذرنه برعيده
وتبقى كون الأحلا عندي .... كون كل هذا الحجيته
بعدي ماكو احد يعيده
وكون مو صوتي اليدّور .... عالإذن ويصيد مسمع
هيه الدّوره وتصيده