للشاعر الشطري المبدع عدنان الزيدي

الشاعر: المبدع عدنان الزيدي \الشطره

الاستــــــــــقرار

علي السبوك همه اتوهموا سبوك
مايدرون
ثمر ينطي النخل من ينشمر بحجار
يا ابسط بشر داخ التواضع بيه
بجدامك يجلب من يشوفك مـــــار
علي ابداخل علي روحين متصلات
روحك ياعلي وروح النبي المــختار
اذن انت النمت بفراش ابو الزهراء
بس حيدر دخل وياه وسط الغـــــار
ولأن وجهك ابد مادرته بالصعبات
قليله ابحقك ايسمونك الكـــــرار
يطيح الصف الاول من تصد على الجيش
بحيث الثاني يدخل شيءطبيعي انـــــذار
بوحده من المعارك ماجنت موجود
ابوكته اعلى الفرس وديت ذو الفــــــقار
المثلك بس علي وماكرره التاريخ
التاريخ ابزمانك يرفض التـــــكرار
انته اول بشر سباق للاسلام
بوكت مزدحمه جانت ياعلي الكـــــــــــفار
وانته اول غني اشكد فقره معتازيه
وانته اول فقير ابعازته التــــــــــجار
قطب رحه الخلافه ومازلت للأن
وطبع بالرحه دوم اعلى القطب تنـــــدار
علي ادنك جنت بس للله يابوحسين
وغيرك بالعكس دنك على الديــــــنار
بس انته جبينك يمشي بيه الضوء
لأن الضوء حيدر من جبينك صـــــــــار
سيفك بالحرب مايحترم كل سيف
شال الفوضى كلهه وحط الأستــــــــــقرار
وماقيسك ابواحد لا اقيسك بيك
لذالك بس علي اليرهم علي الكــــرار